“Контуры” заявілі, што гістарычны цэнтар Горадні закаталі пад асфальт

У нядзелю вечарам 22 красавіка, пад час тэлевізійнай аналітычнай перадачы “Контуры” па ОНТ тэлевядучы Аляксандр Аверкаў заявіў, што гістарычны цэнтар Горадні закаталі пад асфальт.

Размова ў перадачы вялася пра ахову помнікаў. На яе былі запрошаны ўсім нам добра вядомы Ігар Чарняўскі і дырэктар Інстытута гісторыі НАНБ А.Каваленя. Тэлевядучы між іншым запытаўся, а як у нас у краіне стаіць справа з аховай гістарычных цэнтраў гарадоў, бо ж, напрыклад: “гістарычны цэнтар Горадні закаталі пад асфальт”.

Сп. Чарняўскі напружыўся, але, на жаль, пахваліць дзеянні гарадскіх уладаў на ўсю краіну яму не далі. Размова зашла аб нечым іншым і слова ўзяў А.Каваленя.

Падзея так сабе, можа і не надта важная, але, як кажацца, сімптаматычная. Сваім экспромтам сп. Аверкаў выказаў сёння тое, што думае большасць усіх больш-менш талковых беларусаў: “гістарычную Горадню бязбожна руйнуюць.”