Першая 3D-рэканструкцыя Фары Вітаўта

Гродзенская Фара Вітаўта – такі самы важны сімвал нашага горада, як і старадаўняя Барысаглебская (Каложская) царква. З лістапада 1961 года, ужо больш за паўстагоддзя, пра Фару Вітаўта мы толькі згадваем. Усё менш застаецца людзей, якія памятаюць гэты храм, але наш аб’ём ведаў пра яго пастаянна пашыраецца і стварае навуковы і ідэйны падмурак для яго будучага аднаўлення.

3D мадэль Фары Вітаўта (пачатак XIX ст.)

Паданая ніжэй рэканструкцыя ў выглядзе 3D мадэлі – адзін з першых крокаў пераходу ад накаплення ведаў да практычнай працы. Гэтую работу зрабіў адзін малады інжынер-будаўнік, які ў перспектыве плануе ўзяцца за стварэнне мадэляў іншых страчаных храмаў – найперш кармеліцкага і дамініканскага касцёлаў а таксама кляштара бернардзінак, якія зруйнаваныя адносна нядаўна і наяўны аб’ём матэрыялаў дазваляе рэканструяваць іх максімальна дакладна. А з укараненнем тэхналогій аб’ёмнага друку мы хутка зможам атрымаць хаця б невялікія макеты гэтых храмаў.